| |
|||||||||||||||||
| |
|||||||||||||||||
|
|
|
la hougue bie
La tombe fut dêcouvèrte en 1925 duthant eune fouoill'lie par la Sociêté Jèrriaise. À ches drein, nou-s'a dêcouvèrt étout qué, duthant l'êtchinnoxe du r'nouvé et du s'tembre, lé solé l'vant illeunminne lé d'dans d'la tombe. La tombe fut couvèrte par un ênorme mondrîn, mais tchiques siècl'yes auprès la bâtithie, ou fut abandonnée et oubliée. Au Mouoyen Âge, des chapelles Chrêtchiennes fûtent bâties sus l'mondrîn: la chapelle dé Notre Dame de la Clarté au douzième siècl'ye, et pis la chapelle dé Jérusalem en 1520. Ch'fut l'Sieur Richard Mabon, Douoyen d'Jèrri, tchi 'tait l'bâtisseux d'chutte dèrnié chapelle et nou dit tch'i' soulait y présenter des fausses mithacl'yes à seule fîn d'gângni des sou des pélérîns. La fanmil'ye D'Auvergne transformit les ruinnes des chapelles en eune grand' maîson aristocratique d'vièrs 1780 tchi 'tait connu comme la Tou du Prînce. Ou d'vînt eune attraction pouor les touristes tchi c'menchîtent à v'nîn en Jèrri. Y'avait eune supèrbe veue du haut d'la Tou, et un hôtel fut bâti à côté envithon 1830. La Sociêté Jèrriaise acatit la propriété en 1919 et dêtruîsit la Tou et l'hôtel. Duthant l'Otchupâtion, l's Allémands bâtîtent un bunker, où'est qu'ach'teu nou peut vaie eune exhibition entouor l'expéthience d'ches néthes années. |
La Hougue Bie est un monûment Néolithique - iun des pus grands et bein prêsèrvés en Ûrope.